×

La Chambra d’òc despuei d’ans mena un trabalh de recèrcha territoriala sal tèma dal catarisme. Maria Soresina a escrich un libre important sus l’argument: “Libertà va cercando: il catarismo nella Commedia di Dante”. Abo Maria Soresina l’Associacion a produch sus aquel tèma 12 video, vitats da Andrea Fantino e supervisionats da Fredo Valla, publicats sal site de la Chambra e sus youtube.

Aqueste istat en Val Vermenanha son estaas propausaas 4 seradas de fila en 4 país diferents abo la projeccion di 12 video en presença de l’autritz, que lhi a comentats e a respondut a las demandas dal públic. L’iniciativa a agut un grand succès de públic e d’interès.

Un’avant-premiera a Chantar l’Uvèrn, que comença mars 21 de novembre al Parc Fluvial dal Grand Bòsc abo la projeccion de L’eresia catara, Farinata degli Uberti e Marco il Lombardo. En província de Coni, a Rocavion, es estoricament atestaa la presença di catars, en particular de Marco il Lombardo, fondator de la pus importanta Gleisa catara italiana, aquela de Concorezzo, que ben probablament coïncid abo la figura dal Marco Lombardo dantèsc.

Lo cicle d’encòntres contúnia mèrcre 22 de novembre a 20h45 a la ruaa dal Deveis, sempre introduchs e comentats da Maria Soresina, venon projectats Dualisme e creacion, Jesús Crist e la crotz e La Reincarnacion. Se tracta de 3 video que presenton la doctrina di catars, que per l’autritz tròba una confèrma enti vèrs de la Divina Commedia.

Giòus 23 de novembre a 20h45 a la bibliotèca de Cesana venon projectats: No ai sacraments, Lo Consolamentum, dui video que tracton l’argument di catars, e un sal tèma de l’interès de Dante vèrs la lenga occitana: Dante e la lenga d’òc.

Lo cicle d’encòntres s’achaba a Ols venre 24 de novembre a 15h40 a la Uni3 Casa delle Culture abo la projeccion di darriers 3 video, dont dui específics sal catarisme: Creienças e costumas, Calómnais e Libertat e un dedicat al tèma de Dante e lo Sant Graal.

Aquestas seradas pauson de demandas: Dante era erétic? Çò qu’es lo catarisme? Quant era espandut en Itàlia? E en Occitània? Lhi video realizats cèrchon de donar una respòsta an aquestas demandas e venon enrichits da lhi aprofondiments de Maria Soresina.