×

Vista l’afluença excepcionala a la mòstra sus lhi enstruments musicals occitans enti mes de mai e junh, l’Associacion Bouligar decida de prolonjar fins a la fin de l’istat la permanen´ça de l’extaordinària collepcion privaa dal musicaire Celeste Ruà enti locals dal centre polifoncional Lou pourtoun d’ostana.

La colleccion d’entruments típics des sonadas occitanas es lo fruch d’una recèrcha apassionaa començaa enti premiers ans ’90 e encara en cors. Durant la vísita se pòlon admirar a pauc près una centena d’ancians enstruments provenents da las valadas alpinas cuneesas e ren masque.

La seccion mai importanata es aquela di semitons, abo qualqui exemplars dal premier ‘800, periòde ente lo semiton naissia en França. En mai que lhi exemplars construïts da de mèstre artisans, se’n pòlon admirar d’autres fabricats da d’amadors, mas decò da de marcas prestigiosas qu’encara encuei lhi produon, coma per exèmple aquilhi de Paolo Soprani de Castelfidardo. Un exemplar únic es aquel construït a Saluces dai fraires Piovani al començament dal ‘900, familha que devet puei emigrar en Argentina a causa de leis racialas fascistas.

Remarcabla la seria de violons dal premier ‘900 acompanhats da un exemplar provenent da Blins que remonta al 1750. D’admirar decò lhi tambors da banda, entre lhi quals un adobrat per la Baïa de Sampeyre enti premier dal ‘900. Lo tòc mai antic es decò el un enstrument a percussion, un tambor dal ‘700. E puei de còrns, de violas, de cantaranas, de flaüta, de mandolins, d’escarliniers tuchi provenents da la tradicion populara des valadas occitanas.

Per acompanhar la richa colleccion s’organiza venre 11 d’avost a 14.30 lo laboratòri musical MUSICAinCORPO, que vòl, a travèrs la percussion musicala dal còrp ( entendut coma ver e pròpri enstrument musical), desvolopar las intelligenças múltiplas d’un biais divertent, entosiasmant e motivant.

Oraris mòstra: sande 15.00-17.30; diamenja e festius 10.30-12.30; 15.30-17.30. Duberturas enti ferials sus reservacion.

Per info e reservacions: Associacion Bouligar 389 2048214